گلین-قیزلارينگ حالقارا گونى قوتلی بولسون! فایل تصویری
سافارگول خالدزاده بیلن بایرام بی بی ملتی نینگ یاغتی حاطئراسئنا!
شاهئرا: اوغول بی بی بسیم
تورکمنی اؤورنیش مرکزی—1908- نجى ييلينگ 8- نجى مارتيندا آمريكالى عايال ايشچيلـرى اؤزلـرى نينگ آغير ايش شرطلـرينه پروتست اديپ، كؤچه يوريشينه چيقيارلار، پليسينگ اوق آتماغى نتيجه سينده انچمه عايال يارالانيار. آلمانلی سوسیالیست انقلابی زنان کلارا ستکین نینگ ایده یاسی بیلن بوتين دونيأ جمغيتچيليگى هر ييلينگ 8- نجى مارتينى بو غاهريمان عاياللارينگ خاطيرالارينى بلنده گؤتـرمـك اوچين اونى عاياللارينگ حالقارا گونى حؤكمونده بـللأپ گـليأر. بو بايرامچئليق توركمنيستاندا-دا اولى شاوخون بيلن گـچيريليأر، شو پورصاتدان پئـيدالانيپ، توركمن گلين- غيزلارينى 8- نجى مارت بايرامى بيلن تويس يوركدن غوتلاپ، اولارينگ بو گونده چـكيپ گـليأن آغير حوپباتلارى باراسيندا دوروپ گـچمـگى ماخول گؤردويك.
توركمن جمغيئتنده عايال- غيزلارا غويوليان حورمات ميللى شاهيريميز بـييك پراغى نينگ غـوشغولاريندا شئـيله يانگلانيپدير:
” دونيأ سؤزى منگزأر دووزسيز تاغاما سؤز ايچينده گلين- غـيز هم بولماسا”
ميللى تاريخيميزينگ آلطين صاحيپالارينى اؤز غايراتلارى بيلن بزأن توركمن عايال- غيزلارينگ سانى آز دال. ايلكينجى اوغوز- توركمن دؤولئـتينده 6 عايال بـگليك درجه سينه يـتيپدير.
پرنسس تومار خانيمينگ باشتوتانليغيندا توركمن توپراغينا چوزوپ گـلـن هخامنشی لـر پادشاسى كوروشه بـرك غايتاول بـريليأر. 14- نجى عاصيردا صفوی لـرينگ آستراباتداقى باسيبالجيقلى يؤريشلـرى نینگ اؤنگونده دوران آباسردارينگ قشونلارى نينگ آراسيندا انچمه عايال ماشغالا آتا چيقيپ، غيليچ غـوشانانديغينى بيليأريس. ندیرشاه نینگ حایباتندان قورقمان، محمدحسن خان قاجارا پناه برن اوغول بخت دییأن باتئر زنانی کیم اونودیپ بیلر! گؤك دفه غـالاسىنينگ قوراغينا چيقانلارينگ آراسيندا يانگى دونيأ اينئـن بأبـكلـرينى آرقالارينا دانگيپ، روس باسيبالجيلارا غارشى اللـرينه ياراغ آلان آرسلان يوركلى عاياللار بوليپدير. مارى حانى گولجمال ، انقلابی حركتلـرده اولى رول اوينان آرتيق گول تكينسكاىا، شئـيله-ده توركمنيستان رسپوبليكاسى غورلان يئللاريندا سوادسيزليغى يوق اتمـك اوغروندا گؤرشن عاياللار، اولى جمغيتچيليك ايشلئـرينى بيتيرئن، انه قوليوالار بو موقاددس كرونده يـر آليارلار. توركمنلئـرينگ اركينليگى يولوندا گؤرشن آنناسولطان كئـكيلوا، كوممت غاويز شأهرينگ اورتاراسيندا، تأهـران رژيمى نينگ يؤريته ايبـريلـن یاراغلی گویچلری طاراپيندان اوقا دوزولـن سافارگول حالد زاده، اليندأكى6 آيليق بأبـگى بيلن بايرام بى بى ميللتى، حالقينگ يؤرگينده ابدى ياشارلار.
شوروی دؤورينده توركمنيستاندا غازانيلان اؤسوشلـره شول ساندان عاياللارينگ آراسيندا سوادسيزليغى يوق اديپ، اولارينگ يوقارى درجه لى عاليم بولوپ يتيشندیگینه غارامازدان، يوقاردان بويروق بـريجى کاماندا رژيم سبأپلى انچمه عادالاتسيزينگ يوزه چيقانديغينى و شول ظاليم سياساتلار اساسيندا انچمه گـلين- غيزلارينگ اؤز جانلارينا قاصت ادنديگينى بارادا آز خبر یایراماندی. بیز تورکمنیستاندا توركمن گلين- غيزلارينگ آغير ايشلـرده ايشلـديلمـگنی گؤزوميز بيلن گؤردوك. هنيز 12ياشينى دولدورماديق غيزجاغازلارينگ پاغتا ميدانلارينا سورولمگى، گـلين- غيزلار حاقيندا اديليأن ظولومينگ نأدرجه ده آغيرديغينا شاياتليق اديأر.
توركمنيستان اؤز ميللى اركينليگينى جار ادندن سونگ هم بو ظاليم سیاست دوام اديپ گليأر، اوسته سينه نشه کشلیک و غاريپليق ضرارلى اؤز تنلـرينى ساتماغا مجبور بولونماغى هم اونگا غـوشولدى.
ايراندير آوغانيستاندا ياشايان گلين-غيزلارينگ دورموشلارى گون- گچديكچه آغيرلاشيار، اسلام ايدئـولوگياسينا دايانيان هر ايكى حكومت بيزينگ عاصيرلار بويى اركينليكده ياشاپ گليأن گلين-غـيزلارميزى اورتا چاغلارداقى دورموش درجه سينه اؤويرمگى نيت ادينيپ گليأرلـر. اما بيزينگ باى هم غاديمى مدنيتيميز اولارينگ بدپأل لرى نينگ باشا بارماغينا آنگساتليق بيلن يول برمز دييپ اومید ادیأریس.
يـنه بيـر گزك ير شاريندا ياشايان بوتين گلين- غيزلارى 8- نجى مارت بايرامى بيلن تويس يوركدن غـوتلاپ، اولارا برك جان ساغليق، دورموشدا و ايشده گون سايين اگسيلمز ينگيشلر غازانماغينى آرزو اديأريس.
تورکمنی اؤورنیش مرکزی
7-نجی مارت 2021 یئل
