از خاطرات و تجربیات دیگران

سرهـنگ توپخانه گؤرشجنگ افسر سافار خطيـبى نی یاتلاپ!

حزب توده نینگ انقلابى افسر قوراماسى نينگ آعضالاريندان سرهنگ خطیبی  1995– نجى يئلينگ 15– نجى مارتئندا آشغاباتـدا 78 ياشيندا آرادان چيقدى.

حكومت، توركمن دانشجولارينگ بير- بيرينه يازيان حاطلارينى بارلاماق بيلن، اولارينگ آرالاريندا ملى حاق- حقوق بارادا بوليان گوْررينگلردن خبرلى بولوپ، “اولارى حاق سوراماز يالى ادملى” ديين، قراره گليأر. شول اساسدا بيرنأچه توركمن توسساغ اديليأر.


ايل-اولوسى نينگ آلاداسينى ادنلرينگ اقبالى ايلى نينگ اقباليندان آيرا بولمانى اوچين، اولارى يادلاپ، اقباللارىنينگ كسگيتلنشينى اؤورنمك، حالقينگ گچميشينى و تاريخينى اؤورنمگينگ بير گؤرنيشى بوليار. سبأبى آدملارينگ اقبالى ياشان دؤورينده بولوپ گچيأن تاريخى واقعالار نتيجه سينده عمله گليأن ياغداى بيله باغلى بوليار.

آتا- بابالاریميز ” گچميشى بيلمه ديگينگ گلجگـى بولماز” دييپ يؤنه يره آيتماندير. دوغوردانام گچنلرينگـى، گچميشينگـى و تاريخينگـى اؤوره نيپ اوندان ساپاقـدير تجريبه آلينماسا، باشغاچا آيدانگدا اولارا اوْنس برمأن حابارسيز قالينسا، اول گچميشه و اونونگ دگرلرينه (قيمماتليقلارينا) ايه بولوپ بيلنرمى؟

بيزينگ پیكريميزچه ساپار دأده خطيبى نينگ ياشايشى كأ بير جهتدن ايران توركمنلرىنينگ ايلايتا- دا ياش نسيلينگ اوْنس مركزينده دورمالى. اول مرحومينگ ياشان دؤورينده يوْز برن واقعالارى و اوندان سونگراقى لارى سيراش- سيراش، حاطار- حاطار دوْزيپ گؤز اؤنگوْنه گتيريلسه باشيميزا نأمه لر، نأحيلى گليپ، نأمه لرده نأحيلى گلجكديگينه گؤز يتيرمك قين بولماسا گره ك.

ساپار دأده ايراندا حاربى فاكولته تى (دانشكده افسرينى) تماملاپ، افسرى بولوپ، گؤرشجنگ افسرلرينگ گيزلين قوراماسينا آغضا بوليار. اول سرهنگ درجه سينى آليار ولين، قورامانينگ اوْستى نینگ آچيلماغى بيلن شورويه/ توركمنيستانا سيغينماغا مجبور بوليار. بوسغونليقدا توركمن دؤولت اونيورسيته تى نينگ تاريخ-حقوق فاكولته سينى تماملاپ، توركمنيستان عليملار آكادمياسى نينگ تاريخ اينيستيتوتيندا ايشلأپ، كانديدادليق دسرتاتسياسينى (رساله سينى) قوُراپ يتيشيأر.

          سرهنگ ساپار خطيبى نينگ ترجيمه حالى

  (1995-1917)

     ساپار خطيبى 1917/ 1296 ش- نجى يئلدا  اومچالى اوباسيندا دوغوليار. آتاسى آرازقليچ اوسسا، آلتين- كوميش شايلارينگ اوستاسى بولوپدير. ساپار دأده 6 ياشيندا دينى مكدپده اوقوو باشلايار. اوغلانليق دؤورينده توركمنلرينگ تاريخيندا بولوپ گچن اولى بير تاريخى واقعانينگ شايادى بوليار. مرحوم  بو بارادا بيزه شئـيله گوْررينگ بريپدى:

” ارضاشاه توركمن طايپالارىنينگ حان- بگلرينى شول ساندا كوْميش دپه لى آتا حانى آستراباد شأهرينه [تهران حكومتى شوونيستيك مقصدى بيلن بو شهرينگ آدينى 1937/1916- نجى يئلدا اوْيتگه ديپ، اونگا گوْرگن آدينى داقدى] گپله شيگه چاغيريپ،، ديلدوْشيك/ توطئه بيلن اولارى ناماردلارچا اؤلدوردى و ايزيانيندان توركمنلردن ياراغلارينى تابشيريپ، تهرانا بويون بولماقلارينى طالاپ اديپ، اولتيماتوم بريأر. توركمنلر بريلن اولتيماتوما قارشى بير قرارا گلمك اوْچين طايپا وكيللرىنينگ قورولتايئنى اومچالى اوباسيندا گچيريأرلر. قورولتاى 1924/1303 ش- نجى يئلينگ 20- نجى ماى/30- نجى ارديبهشت آيئندا ديوانه پانگ آدلى بيرسى نينگ توت آغاجى نينگ يانداقى گينگليكده(ميداندا) گچيريلدى. شوندا ايلركى جمهوريت قورماق قرارى آلنيپ، اونگا عثمــان آخـــونى پره زيدنت بللأپ، آق قــــالا شأهـــريــنى بولسا پايتخت و پره- زيدنت ماصلاحاتچيلارى نينگ کیملر بولمالیدیغی بارادا راضى لاشيارلار. بيز بو تاريخى واقعانى بير نأچه دنگ- دوش اوغلانلار بيلن ياپـراغى دولى چيقيپ يتيشمه ديك شول توت آغاجينگ حاتچا(شاخا)لارينا موْنيپ گوزلأپ دورديق”

ساپار دأده نینگ باشلانغيچ و اورتا مكتبلرده اوقان دؤورى، ارضا پهلوىنینگ، 19- نجى عاصرينگ 2- نجى ياريميندا (1881- نجى يئلينگ 9- نجى دسامبريندا) روس كولونياليزمى نينگ (استعمارنينگ)  توركمن توپراغينى پارچالاپ، ايرانا برن بؤله گينى 1925- نجى يئلدا اوْچ  لشگر(ديويزيا)  قشون بيلن ايه لمگـیندن سونگقی واقعالارا غابات گلیأر. پادشانینگ ايلكى ادن ايشى قاديمدان گليأن توركمن مكتبلرينى یاتیرماق بولدى. ظاليم پادشاه كولونياليزمينگ پلانى بويونچا مشروطيت انقلابى نينگ جارناماسينى نينگ(منشورىنينگ) ايراندا ياشايان حالقلارا بريأن حاق- حقوقلارينى دپه لأپ، دؤولت مكتبلرينى دينگه پارس ديلينده آچديردى. كوميش دپه- ده، اومچالى، حوجه نفس، آريق و بأش يووسغا یالی اوبالاردا، آق قالا- دا، كوممت قاويز- دا و آى درويشدا پارس ديلينده ساپاق بريان اوقوو جايلارآچيليپ باشلاندى . ساپار دأده بو بارادا شئـيله يادلاپدى:

 

” توركمن مكتبلرى ياپديريليانچا، من ايكى يئلدان قاوراق واقتينگ ايچينده اوتـكـدن eftekden/ هفت- يك(قرانينگ يديدن بير بؤلگـى)، 15- نجى عاصير توركمن شاهيرى وفايىنينگ اثرى “رونق الاسلام ” دان و صوفى الله- يارينگ ثبات العاجزين منظومه سيندان ايزلى-ايزينا سافاق آليپ، سيناغلارى(امتحانلارى) اوْستونليكلى گچيريپ، مختصر دؤره سينى(كأميلشديرمه دينى كورسينى) باشلاديم. بو كورسده فقه كيدان دان سافاق آليپ قوتارديم ولين اوستوميزه سوْريپ گلن تهران قوشونى بيلن توركمنلر آراسيندا سؤوش باشلانيپ اوقوولار ياتيريلدى. توركمنصحرانينگ گوْنباتارينداقى اوبالار شول ساندان اوباميز اومچالى نينگ باسيليپ آلينماغى بيلن بار زات دوْيبوْندن اوْيتگأپ باشلادى. تأزه حكومت حايال ادمأن ايلكى پارس ديلينده مكتپ آچيپ، توركمن مكتبلرىنينگ اوقووچيلارينى اؤنگكى اوقان يئللارينى حاسابا آليپ، تأزه مكتبلره قبول اتديلر. نتيجه ده آلتى يئلليق باشلانغيچ مكتبينگ سونگقى اگزامينينى/ امتحانينى 1308/1929- نجى يئلينگ باشلاريندا اوْچ سانى كلاسداشيم عـوض انصارى، سافار انصارى و بايرام محمد مدرسى بيلن تماملاديم. باشلانغيچ و اورتا مكتبلرينگ سونگقى امتحانلارى، يؤريته بير اگزامين بولوپ، مركزلرده يا- دا اولى شهرلرده گچيريليأردى. شونونگ اوچين بيزى هم آستراباد شهرينه آليپ گيتديلر. امتحانينى اوستونليك بيلن گچيرنلرينگ راضيليغى بيلن اولارينگ پايتخت تهراندا اوقيماغينا روغصات بريلدى. شول يئلينگ تومسوندا پادشاه كوميش دپأ گلنده بو بخشده 13 سانى باشلانغيچ مكتبى قوتارانلارى آسترابادينگ حاكم نظاميسى سرهنگ حكيمى پادشانى قارشى آلماق اوچين يئغناپ گتيردى. شوندا حأكم بيزينگ اوقوو ياغدايميز حاقيندا پادشاه راپورت بريپ، توركمن توپراغيندا اورتا مكتب بولمانى اوچين بيزى بير يرده اوقيتماغا ياردام سورادى. پادشاه هم: ” بولارى تهراندا اوقادينگ، توركمنلرينگ تهران بيلن قاتناشيغى نأچه كؤپ بولسا شونچادا ياغشى بولار” دييپ سؤزىنينگ اوستونه قوشدى. بيزدن بير يئل اؤنگ 4 سانى توركمن اوقوچيلارينى تهرانه آليپ گيديپديرلر. اولار عبدالرحمان فرزانه، حليم صيادى، ارجب ناظرى و قاراتاغى نينگ اوغلى نفس مأميانى(مهميانى/ سونگ كمالى فاميله اوْيتگه ديلدى). بيزى قيشينگ اورتاراسيندا تهرانا آليپ گيتديلر و حايال ادمأن اوقووا يرلشديرديلر. آلتى يئلليق اورتا مكتبينگ سونگقى امتحانينى 1315/1936- نجى يئلينگ باشلاريندا اوْستوْنليكلى گچيريپ، يوقارى اوقووى باشغا- دا 3 سانى توركمن يولداشيم سارى گوكلانى، قـربان محمد سيورى Siveri  و الياس مختوم بيلن دانشكده افسرى ده اوقيپ باشلاديم”.

    تهران حكومتى 1936/1316- نجى يئلدا توركمنلردن كؤپ آدمى شول ساندان دانشجولارى ملى مسله لرى قوزغايانليقدا عايپلاپ توسساغ اديأر. شوندا دانشكده نظام ده اوقيانلاردان الياس مختوم بيلن ساپار خطيبى اوزاق ساقلانمان بوشاديليار. اما باشغالار اوزاق مهلت بيلن ساقلانيار. توسساغ اديلينلردن توركيه عليم آليپ گلن حاجى حان (نورگلدى) اوغـوزى بيلن قربان محمد سيورى زنداندا اؤلدوْريليأر. قالان ييگيتلر، 2- نجى جهان اورشيندا فاشيزيمه قارشى بيرلشن دؤولتلرينگ ياغنى شوروى، آمريكا و انگليس قوشونلارى ايرانا گيرمگـى (1941/1320) بيلن فاشيست ارضاشاه يورتدن قاچيپ گيدمگـى و سياسى توسساغلارينگ آزاد بولماغى نتيجه سينده اركينليگه قاويشيار. ارضاشانينگ حكومتى (اوغلى محمدرضانينگقى- دا) فارس شوونيستلارينگ حكومتيدى. اولار ايرانى فارس ديللى حالقلارينگ واطانى دييپ، ايراندا ياشايان بئـيله كى حالقلارى يا ديلى گلميشـك واغشى توركلر!(اساسان توركمنلر) طاراپـيندان اوْيتگه- ديلن فارسلار دييپ، ايندى اولارا قايتادان فارس ديلينى اؤرتملى دييپ تبليغ اديأردى يا- دا هيچ بير انسان حاق- حقوقونا لايق گلمه یأن واغشیلار دییپ ييگره نيأرديلر.

   بيز ساپار دأده دن توركمن دانشجولارينگ سياسى ياغدايى و توتها- توتليغينگ سبأبى حاقيندا سورانميزدا اول پاخير شئـيله گوْررينگ بريپدى:

” حكومت، توركمن دانشجولارينگ بير- بيرينه يازيان حاطلارينى بارلاماق بيلن، اولارينگ آرالاريندا ملى حاق- حقوق بارادا بوليان گوْررينگلردن خبرلى بولوپ، “اولارى حاق سوراماز يالى ادملى” ديين، قراره گليأر. شول اساسدا بيرنأچه توركمن توسساغ اديليأر. بو حاقدا يئنه- ده بير ميش- ميش گوررينگ باردى، اولام شودى: حكومت پلانى بويونچا ملى مجليسينگ هر ساپارقى سايلاويندا محمدآخون گرگانى يكه- تأك كانديداد گؤركزيليپ توركمنلرينگ وكيلى اديپ مجليسه ايبريليأردى. توركمن دانشجولارى بو ايشه قارشى بولوپ، گلجككى سايلاودا عبدالرحمان فرزانه نى كانديد ادملى دييپ گوْررينگ اديأرديلر. اولارينگ بو فكرلرى توركمنلرينگ ايچينده هم يايراپ قولدانيپ باشلانيار. شوندا محمدآخون ايچرى ايشلر وزيرينگ يانينا باريپ: “بو حركتى اديأنلر پان توركيستلر” دييپ دانشجولارى قارالايار و ” واقتيندا اونونگ اؤنگونى آلمازسانگيز سونگرا حكومته اولى ايش بولار” دييپ دوْشوْنديريأر. آخون، حتى بو ياغدايئنگ اؤنگونى آلماق اوچين وزيره پارا- پشكش بريپدير هم دييليأر. شول وقت ايرانينگ سياسى ليدرلريندن، “دنيأ” آدلى سياسى- تئوريك مجله نينگ باش يازارى دكتر تقى ارانى اؤز اگيندشلرى بيلن زنداندادى. اولارينگ سانى 53 بولانى اوچين اولار “53- لر توپارى” ديليپ تانيلياردى. اولارينگ آراسيندا آنناقليچ بابايى آديندا بير توركمن هم باردى. بو توپار زنداندان بوشاندان سونگ، “ايرانينگ توده حزبينى” قوريارلار. آنناقليچ ايلكى شول پارتيانينگ حاطاريندادى، سونگرا اوندان آيريليپ، دؤولتينگ سياساتينا ميل لى “دموكرات پارتياسينا” گچيأر. 53- لرينگ ليدرى ملتى آذربايجان توركلريندن بولان دكتر ارانى بولسا زنداندا اؤلدوريليأر. دكتر ارانى زنداندا توركمنلره: “اؤزينگيزى كمونيست ديسه نگيز بار بولان قانونا گؤرأ آنگيرسى 10 يئل زندان كسيلر، اساسان سيزه دگيشلى قانونى ماده بولمانى اوچين اقبالينگيزى پادشاه كسگيتلملى بولار، اول-هم كؤپـينگيزه آتوو جزاسينى بره ر” دييأر. اونونگ بو ماصلاحاتى توركمنلرى ايكأ بؤليأر. بير بؤلگـى: “اؤلدوْرسه لرده اؤزيميزه كمونيست ديمه ريس” دييأر. باشغالارى بولسا اونونگ ماصلاحاتينى قبول اديأرلر. شوُ توتها- توتليقدا دانشكده افسرى ده اوقييان توركمن دانشجولارى- دا گؤز آستينا آلنيار. شوندا درنگوچيلر مندن: ” ديش دكترى عبدالرحمان فرزانه نى تانييارمينگ؟ ياش توركيستان ژورنالينى (توركيستانلى سياسى بوسغونلار  طاراپيندان پاريس ده نشر اديليأردى. بو مجله توركمنصحرادا- دا يايراديلياردى- گ) اوقيدينگمى؟ شوروى ده بولدونگمى؟ و ش .م سوراغلارى سورادى. من سوراغلارا دوغرى و دقتلى جوغاپ برديم. مثلم : “ياش توركيستان ژورنالى قازاق توركچه سينده[آصلينده ازبكچه- گ] يازيلانى اوچين اوقيپ بيلمه ديم” ديديم. اولار منى اوزاق واقتلاپ ساقلامان، اوقييان يريمه ايبرديلر. الياس مختومى ايكى آيدان سونگ بوشاتديلار، قالانلارى ساقلاديلار”.

  ساپار دأده ايران قشونيندا قوللوق ادن دؤورى حاقيندا شئـيله گوْررينگ بريپدى:

ايكى يئلليق دانشكده افسرينى تماملاپ ستوان بولدوم. منى ايران بلوچستانى نينگ مُكران (سونگرا اونونگ آدى ايرانشهره اوْيتگه ديلدى) شهريندأكى آطلى قشون بؤلومينه ايبرديلر. اول يرينگ هواسى قاتى ايسسى بولانى اوچين آطينگ يرينه يـل مايا دؤيه لر اوللانيلياردى. ارضاشاه يورتدن قاچيپ گيدنده من سرحد ياقسينداقى خاش شهريندأكى پادگاندا قوللوق اديأرديم. ايكى يئل سونگرا تهرانينگ دميرقازيغيندا يرلشيأن عباس آباد پادگانيندا آمريكان ياراغلارينى اؤوره نيش ايكى يئليق كورسينى اوقيپ باشلاديم. بو كورسى اوْستونليكلى تماملانيم اوْچين افسرلردن آشاقدا دوريانلارا گچيريليأن كلاسينا معلم اديپ بلله ديلر. اديل شول يئل آذربايجانينگ دموكرات فرقه سى طاراپـيندان ايراندا بار بولان قانونا سالغيلانيپ تؤريز(تبريز) شهرينده ملى مجلس وخودمختار حكومت دؤره ديلدى. دانشكده افسرى آچيلاندا1946/1325 اول يرده اوقيپ سرگرد بولوپ يئنه- ده قشونينگ قوُرخانه اداراسيندا ايشلأپ باشلاديم. بو ايشده ايران قشونيندان فرانسه، روسيه، سوئد و چكسواكى ياراغلارينى آيريپ، يرينى آمريكان ياراغلارى بيلن اوْپجين ادمك دوره سينه قاتناشديم. شوندا گره ك بولان يئنه بير يئلليق يؤروْيته لشديريلن نظامى دوره سينى دانشكده ده گچيريپ، كرمان شهريندأكى قشون بؤلومينده ايشلمك اوْچين اول يره گيتملى بولدوم. 1327- نجى يئلدا اول يردن هم شيراز شهريندأكى پادگانينگ قوُرحاناسيندا اولى پارتلاما بوُلانى اوْچين، پادشانينگ يؤروْيته بويروغى بيلن شيرازه گيتملى بولدوم. پادشاه 1953/1327- نجى يئلدا اؤز طاراپدارلارى بيلن باش وزير دكتر مصدق- ينگ قارشيسينا دؤولت آغداريلشيغينى گچيريأر. بو واقعا ايرانينگ چاغداش تاريخيندا اولى اهميته ايه بولانى اوْچين بو حاقدا گينگرأك گوْررينگ بره يين.

ارضاشاه قاچيپ گيدندن سونگ، مجليسينگ قرارى بيلن شانينگ اوغلى اونونگ يرينه گچيأر. آيرى طاراپدان باشغا حزبلر دؤره ديليپ، مشروطه انقلابى نينگ جارناماسى و اساسى قانون بويونچا پادشانينگ گويجينى چأكلنديرمك- ياغنى يورتدا دينگه قانون حكم سوْرملى دييپ- حركت اديپ باشلايارلار. ايرانى باسيپ آلان دؤولتلرينگ (انگليس، آمريكا، و شوروى) اؤز آرالارينداقى قرارا گؤرأ اورش قوتاراندان 6 آى سونگ ايرانى ترك ادمه ليديلر. انگليس بيلن آمريكا، آيديلان واقتدا قوشونلارينى چيقارديلار، يؤنه شوروى ايرانينگ دميرقازيغينداقى نفت ياتاقلاريندان، ايران بيلن اورتاق نفت قازيپ چيقارمالى ديين ايلالاشيغى طالاپ اديپ، قيزيل قوشونينى ايراندان چيقارمادى.

شوروى حكومتى نينگ بو طالابينى ايرانينگ ايچينده دينگه “توده حزبى” قولداپ، “ايرانينگ گون اورتاسينداقى نفتى ملى اديپ، دولى دؤولتينگ كنترولينا گچملى، دميرقازيقداقى نفت ياتاقلارينى بولسا شوروى پئيدالانمالى” ديين شيغارينى اورتا آتدى. بو واقعادان بير يئل اوُنگ آذربايجان دموكرات فرقه سى تؤريز شهرينده يرلى حكومت و ملى مجليسى دؤره ديپ، تهراندان مشروطيت انقلابى نينگ جارناماسى اساسيندا آذربايجان و باشغا ملى آزچيليقلارينگ خودمختاريسينى قبول ادمگـى طالاپ اديأر. اما تهران حكومتى استالين- ينگ ايلالاشيق تكليبينى قبول اديپ اؤز وزيرينى مسكوه ايبريأر. ايز يانى بيلن آذربايجانا قشون سوْريپ، يرلى حكومتى و ملى مجليسى دارغاديار. اول واقيتدا آيديلشينا گؤرأ 15 موْنگدن قاويراق آذرى حالقى اؤلدوْريليپ، 30 موْنگه ياقينى بولسا قايراقى آذربايجانا سيغينماغا مجبور بوليار. آذربايجاندان سونگ، شانينگ قشونى كردستانينگ دموكرات حزبى نينگ مهاباد شهرينده اساسلانديران خودمختار حكومتينى هم آغداريار. پادشاه بو اوْستونليكلردن! سونگ آتاسى يالى حكومتى دولى اؤز اركينه گچيرمك كوْينه دوْشيأر. شو آرادا بير نأچه سياسى حزبلر ايرانينگ بللى حقوقچى و ملى شخصيت بولان دكتر مصدقينگ يولباشچيليغيندا ” جبهـه ملى آديندا” بير سياسى حركتى اساسلانديرديلار. ايرانينگ  جبهه ملى حركتى، دموكراتيك اصوللاردان اوغور آليپ، قانون بويونچا پادشانينگ گوْيجونى چأكلنديرمگـى و ايرانينگ نفتينى داشارى يورتلى شركت لرينگ اليندن دولى چيقاريپ، ملى (دؤولت كنترولينا گچيرمگـى) اديلمگينى مقصد اديپ قوييار. حالق آراسيندا كأن قوُلداو تاپانى اوچين بو حركت مجليسده كؤپ اورون ايه ليأر. دكتر مصدق باش وزير بولوپ، وزيرلر كابينه تى(حکومت) قوريار. دكتر مصدق حالقا برن سؤزينى عمله آشيرماق اوغروندا حركت اديأر. ايلكى باشدا نفت صناغاتينى ملى اديپ، انگليسلرى بو پوداقدان چيقاريار و دولى دؤولتينگ اركينه گچيريپ، ” ايرانينگ ملى نفت شركتينى دؤره ديأر. ” جبهه ملى” دان سونگ توده پارتياسى گوْيچلنيأر. بو ياغداى گونباتارى، ايلايتا- دا آمريكانى، ايرانينگ شوروى طاراپـينا گچمكدن حواطيرلانديريار. بو ياغدايدان شاه و طاراپدارلارى پـيدالانيپ قشون ايچيندأكى طاراپدارلارى بيلن 1953/1332- نجى يئلينگ 25- نجى مرداد/14- نجى آگوستيندا دؤولت آغداريلشيق ايشينى گچيرمكچى بوليار. اما بيزينگ (افسرلرينگ) گيزلين قوراماسى باش وزير دكتر مصدق-غه ياغدايى واقتيندا خبر بريپ، قشونينگ ايچيندأكى ملى افسرلر پادشانينگ شوم نيه تى نينگ اؤنگوْنى آليار. پادشاه خزر دنگزى نينگ ياقاسينداقى رامسر شهريندأكى كؤشگيندن عراقينگ پايتختى بغدادا قاچيپ گيديأر. شول واقت عراقدا انگليسلرينگ ديكمه سى بولان ملك فيصل بيله، باش وزيرى نورى سعيد حأكميت باشينداديلار. پادشانينگ طاراپدارلارى آمريكا و انگليسينگ كمكى بيلن 3 گون سونگرا(17- نجى آگوستدا/ 28- نجى مرداد دا) بير ياويز پلان اساسيندا ملى دؤولتى آغداريارلار. بو گزه ك بيزينگ گيزلين قوراماميز توده پارتيانينگ ماصلاحاتى بيلن شاه طاراپدارلارينا كمك بريپ باشلايار. نتيجه ده شاه و طاراپدارلارى ماقصاتلارينا يتيپ، ايراندا 12 يئللاپ دوام اديپ گليأن دموكراتيك ياغدايئنگ سونگونا يـتيأرلر. آدى “پان ايرانيست” آصليندا “پان فارسيست” (اولار ايرانى دينگه فارسلارينگ توپراغى بيليأرلر) حزبى و اونونگ بيلن اوغورداش بير ايكى سانى توپار بيله جمعيت دن باشغالارى قاداغان اديليأر. اؤلن اؤليأر، توتولان توتوليار.، قاچان قاچيار. اوزينگ كپـينگ قيسغاسى ايراندا قايتادان شاه چى فارس شوونيستلار پادشانينگ باش توتانليغيندا حكومت اديپ باشلايارلار. دكتر مصدقينگ دؤولتى آغداريلاندان سونگ من سرهنگ درجه سينى آلديم. شيرازدا قاراشيلماديق بير واقعا منينگ توتولماغيما سبأپ بولدى. منى قصر قاجار زندانينا گتيرديلر. اول يرده سرلشكر قره نى، توتولان افسرلر شول ساندا منگ بيله بييرين- بييرين گپله شيپ بيزى زنداندان بوشاتدى. 1954/1333- نجى يئلدا بيزينگ گيزلين انقلابى افسرلر قوراماميزينگ اوْستى آچيليپ، آغضالارى توتوليپ باشلاندى. شوندا من گيزلنيپ يـتيشديم و قوراماميزينگ ليدرى خسرو روزبه بيلن آراقاتناشيقدا بولوپ، اونونگ ماصلاحاتى بيلن 1945- نجى يئلينگ سپتامبرينده شورويه سيغينديم”.

ساپار دأده 1948/1327- نجى يئلدا اؤيلنيأر، اونونگ ايراندا 2 قيزى بوليار. سافار دأدأنينگ عيالى-أذری تورکلریندن- فاطمه خانم 3 يئل سونگرا 1948- نجى يئلدا قيزلارى بيلن عراقينگ اوْستی بیلن شورويه گچيأر. اولار آشغاباتدا يرلشيأرلر. سافار دأده توركمن دؤولت اونيورسيته تى نينگ تاريخ- حقوق فاكولته تينى تماملاپ، توركمنيستان عليملار آكادمياسى نينگ تاريخ انيستيتوتيندا ايشله يأر و تاريخ علمى نينگ كانديداتي بولوپ، شول يردن پنسيا چیقیار(بازنشسته بوليار). اونونگ توركمنيستاندا ايكى سانى اوغلى بوليار، اؤيلرينده فارس و روس ديللرده گپلشيلنى اوْچين اوغلانلار توركمن ديلينده ياغشى گوْرلأپ بيلمه يأرلر. بو حاقدا بير گزه ك گوْررينگ قوزغالاندا، ساپار دأده شئيله ديدى:

” بيز قاتى يالنگيشديق، بيزدن بـتر سرگرد عبدالرحيم نديمى[1]  و دكتر موسى مختوم  داغی يالنگيش يولا دوْشديلر. موندان بئـيلأك توركمنينگ نسلى بئـيله يالنگيشمالی دأل، اولار اؤز ملى دگرلرينه اساسانام ديل و مدنيتيمیزه ايه چيقمالى” دييپ آرزو اتدى.

    اول یئنه:

” من بو گونه چنلى افسرلر قوراماسيندان باشغا هيچ بير يرده آغضا بولمانديم. بيز مهاجرتده هم اؤز قوراماميزى ساقلاديق، من هم اونونگ آكتيو آغضاسى بولوپ قاتناشديم. ايندى يؤنه اؤلن اؤلدى، قالانلارى هم قارريپ هرسى بير يرده قالدى. سيز اؤز توركمن توپارینگیزی اؤسدوْرجك بولونگ، تاريخ، ديل و ادبياتميزا، عمومان مدنيت پوداقلارينا اوْنس بريپ دورينگ. مسئله سيز/ پرابلمسيز اویشمه لنگ يوقدور، مسئله لره منطقلى و مدنييتلى چملشمگـى باشاريپ، گويچ بولوپ دورسانگيز، حاسابا آلنارسينگيز. اگرده قینچیلیقلارا احساسى (دويغى بيلن) چملشسه نگيز هيچ زادى چؤزوپ بیلمرسینگیز. من- ده اليمدن گلن كؤمگـى وظيفه بيليپ قايغيرمارين”. دییپدی.

ساپار دأده 1995- نجى يئلينگ مارت آيى نينگ 15- ينده/1373- نجى يئلينگ اسفند آيى نينگ 24- ينده توركمنيستانينگ پايتاغتى آشغابات شهرينده آرادان چيقيپ، شهرينگ قونومچيليغيندا توپراغا بريلدى. ياتان يرى ياغتى بولسين.

آ.گلی

تاریخچی

سوئد 2018


كأبير قـوشماچا بلليكلر

 بو یاتلامانی ایلکینجی گزک “مدنی و سیاسی اوجاغینگ” آدی بیلن نشیر ادیپدیک. حأضیر اونی کأمیللشدیریپ غایتادان اوقیجیلارا حؤدورله یأریس.  یاتلامانی تاییارلاماقدا یوسف. ک نینگ تاغاللاسی کؤپ بولدی. آ.گ.

    ساپار آقا جافاربايئنگ اونيق توماج تيره سى نينگ قـوشلى Guşly شاخاسيندن دير. 3- نجى كلاسه چنلى اومچالى اوباسيندا اوقايار. 1308- نجى يئلدا گورگنه اوقوو گيديأر. مرحوم ینگ کاستـه یازیلان سس یازغیسیندا یئنه شئیله ماغلوماتلار باردی:

كوميش دپه ده ارجب آخون صيادى توركيه لى معلملارى چاغيريپ چاغداش مكتبی يولا قوييار. توركى ديلينده سافاق بريأن بو مكتبينگ 6-5 سانى شأگردى باردى. ارجب آخونينگ بو ايشينه قارشى آخونلار، تورك معلملارينگ بيريسينى قارقى اوباسى نينگ قولايندا اؤلدورديألر. اومچالى اوباسينداقى دينى مكتبده بأش يوسغالى ملاميرزا قوشلى سافاق بريأردى.

1927/1306- نجى يئلدا حليم جان صيادى، ارجب ناظرى(مهندس)، عبدالرحمان فرزانه، نفس كمالى توركييأ اوقوو گيديارلر. سونگرا محمدقليحان جوده نينگ اوغلى نازدوردى يموت (توركيه ده ياشاپ شول يرده آرادان چيقدى)، آنه محمد حاجى نينگ اوغلی محمد گوكلان (حأضير آمريكادا ياشايار/ دكتر) ، احمد قاراداغلى، حاجى محمد قاراداغلى، داش طاغانينگ اينيسى، بايجان تورانى (اول تاريخ اوقادى و نأبللى ياغدايدا اؤلدوريلدى، مزارى- دا بللى دأل) هم توركييأ گيديأرلر.

اومچالى قورولتايئندا عثمان آخونى جمهورباشليق سايلانلاريندا 3 گزه ك راضى مينگيز؟ دييپ مأركه دن سوراديلار. سونگ كوممت قاويز شهرينده اونى آق كچئأ موندوريپ، 3 گزه ك قابوس يأديگأرليگـى نينگ داشيندان آيلاپديرلار. بو دأپ توركى حالقلارينگ آراسيندا اؤرأن قديم زامانلاردان بأرى ساقلانيپ گليپدير.

حوجه نفس لى دولت برديحانينگ، قاجار پادشالارى طاراپيندان يؤروْيته سيلاغ حاطى باردى. حضرتقلى حان ساللاخ بيلن حوجه نفسده اولى حان دی.

ارضاشانينگ قشونى بأش يووسغادا نأچه توركمنى اؤلدوْريأر، اومچالى اوباسيندا نورآخونينگ اوغلى “كؤچك” (كر) اؤلدوْريليأر. اومچالى دا، نورالله اوغلى نصرالله آدلى بير عسگر اؤلدوْريليأر.

   ملا سؤيوْنينگ اؤغلى عبدالقادير نيازى حكومته سالغيت يئغنايان مأموردى. على آبادينگ تؤوه ره گينده ياشايان توركمنلرينگ عياللاريندان 40-30 سانيسينى املاك اداراسى نينگ بويروغى بيلن اؤيوْنده (گينگ حاوليسيندا) توتون ياپراقلارينى قوروتماق اوچين زور بيلن گتيريليأردى. اوُلارينگ أرلرينى جنگل لردن اوُدون كسمأگه ايبريأرديلر، عياللارا دينگه قورى چؤره ك بريأرديلر.

كوميش دپه مدرسه سى نينگ ايلكينجى معلملارى:

مهدى اميرپاشايى(ياور منوچهرحان اميرپاشايى نينگ دوغانى)

ميرعظيم: ورزش معلمى، قفقازدان.

حوجه نفسينگ اؤكده اوقوچيلاريندان: قوربانقليچ معظمى، عبدالقادر نيازى، كريم، نفس آخونينگ اوغلى مجيد.

كوميش دپه و اومچالى اوباسيندا اؤكده اوقوچيلار باردى، اولارينگ سانى 30 – ه  يتيأردى.

شوروىنينگ قيزيل قشونى ايرانه گلنده ملا سؤيوْنينگ آيتماغينا گؤرأ سروان قليچ مأد نيازى سرباز يئغنان مأموردى. گورگن قشونى قيزيل قوشونينگ اؤنگونده دوروپ بيلمه يأر، گورگن قشونيندا قولليق اديأنلردن بير توپار افسرى 6 آيلاپ آشغاباتدا ساقلايارلار، اولارينگ آراسيندا سروان قليچ مأد نيازى- دا بولوپدير. قيزيل قشون گيدنده آط چاپديريپ حوشلاشما داباراسى بولدى.

دارالتربيه(معلم چيليك تربيه بريأن) مكتبينگ توركمن اوُقوچيلارى:

سافار انصارى، بايرام محمد مدرسى، تأج بردى گوكلانى، نورى مختوم، الياس مختوم، مأمدقليحانينگ دوغانى، سارى گوكلانى، عبدالرحمان فرزانه، سارى كاسب.

دانشكده افسرىنينگ شاگردلريندن: قربان محمد سيورى، آشورمأد(مهشيد)، گل محمدى(سرهنگ)

1937/1316- نجى يئلدان باشلانيپ، تهرانينگ اقدسيه پادگانيندا توتها- توتليقلار باشلاندى. فرزانه 10 يئل زندانا حكم اديلدى، فرزانه ياش توركيستان ژورنالينى توركمن دانشجولرينگ آراسيندا پايلاياردى. حليم صيادى و نورى مختوم هم توتوليار، بايرام محمد مدرسى گونورتا ايرانا سوْرگوْن اديليأر. سرهنگ خطيبى ايچرده 9 يئللاپ انقلابى افسرلرينگ گيزلين قوراماسيندا ايشلأپدير.


اول 1945/1324- نجى يئلدا خراسان افسرلرىنينگ ياراغلى قوزغالانگينا قوشوليپ كوممت قاويزدقى چاقناشيقدان سونگ آذربايجانا گچيأر و شول يردن اورسيه دينگ ايوانف شهرينده بير روس عيالى بيلن اؤيله نيپ، شول يرده هم آرادان چيقيار.

كوميش دپه لى بللى نورى مختومينگ اوغلى. موسى 1968- نجى يئللاردا توركمنيستانا گچيأر. سونگرا باكودا دكترچيليق اوقووينى بيتيريأر

برچسب ها

نمایش بیشتر

نوشته های مشابه

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

دکمه بازگشت به بالا
بستن